عبد المتعال السيد:رقصت مع روضة جوان..

[ندعوك للتسجيل في المنتدى أو التعريف بنفسك لمعاينة هذه الصورة] لسخونة الأحداث التي صاحبتها.. تربعت قضية روضة جوان على عرش اهتمامات الرأي العام.. وأفرزت العديد من ردود الأفعال، وانقسم الناس ما بين مؤيد ورافض، على أن البعض تملكته الحيرة، ولا زال عاجزاً عن استيعاب سيناريو روضة جوان.. وحرصنا على الحصول على كافة المعلومات التي من شأنها إزاحة الضباب عن هذه القضية.. وها هي تفسح مجدداً المجال للرأي.. والرأي الآخر:

أنا كنت من المقربين جداً لي نميري على المستوى الشخصي.. وكنت في التنظيم عضواً بالمكتب السياسي، وأمين منطقة شرق النيل والآن أنا أمين منطقة الخرطوم.
كنت معتقل في سجن دبك. ثم خرجت منه وتوجهت إلى القاهرة حيث قضيت (14) عاماً مع السيد الرئيس حتى قدومه إلى السودان، وجئت قبله بأربعة أشهر.
متى رأيت روضة لأول مرة.؟!
كان ذلك قبل أربعة أعوام في حفل أقيم في دار تحالف قوى الشعب العاملة بشارع الجامعة، ورقصت معاها كمان، نعم والله رقصت معاها كان السيد الرئيس جالس وبقربه السيدة حرمه بثينة خليل، وكانت السيدة روضة ترقص فرقصت معاها وما كنت عارف أنها زوجة السيد الرئيس.
متى عرفت أنها زوجته.؟!
ثاني يوم من الحفل مشيت ليهو في البيت.. فقام قال لي ده شنو رقيص أمبارح ده؟. رقيص شنو يا ريس؟. ترقص مع مرتي يا عبد المتعال. قلت ليه: مرتك منو ياريس أنا ما رقصت مع بثينة. رد عليّ: الكنت بترقص معاها دي مرتي.. يا عبد المتعال وسكت.. تفاجأت بالموضوع وسألته: مرتك كيف يا ريس.؟!
قال لي: مرتي عديل كده.. وسكت وأنا تاني ما سألت.
ليه ما سألتو وكت استغربته من الموضوع.؟!
هو سكت وما أداني فرصة أتكلم في الموضوع.
لاحظت حاجة في ملامحو وهو يقول ليك الكلام ده.؟!
- أيوه.. كان جادي جداً.. في كلامو.. وأنا بعرفوا لمن يكون جادي في كلامو.
ما كلمك عن الموضوع ده مرة ثانية.؟!
أبداً.. ما أتكملنا خالص في الموضوع..
معليش بس إنت قلت إنك قريب منو.. قريب منو كيف.. وإنت ما عارف زوجتو.. وهو ما بكلمك بي خصوصياتو.؟!
كان يكلمني والله، بس شكلو كان متكتم على الموضوع ده شديد.
تفتكر ليه كان متكتم عليه.؟!
أعتقد لأنه كان يحترم بثينة، أو بي سبب احترامه لي شكل العلاقة الكان بيناتهم، فهو يحترم السيدة بثينة جداً.. وهو ذاتو كان رجل يحترم إحساس الآخرين بشكل غريب.
بي حكم قربك منو في القاهرة، ما كنت بتشوفها في مكان إقامتو هناك.. يعني لو معاهو أو براها.؟!
والله ما حصل شفتها هناك وزي ما قلت ليك أول مرة وآخر مرة أشوفها كانت في الحفلة ديك.
مش كنت بتقعد معاهو كثير.؟!
كنت بقعد معاهو كتير صاح.. بس في الصالون ومحل بقعدو الناس كلهم يعني ما بدخل وبلف في البيت مهما كان صاحبي وعلاقتي بيهو فهو رئيسنا وعندو احترامو الخاص.
طيب في رأيك وبحكم معرفتك بيهو وعلاقتك الخاصة هل ممكن يتزوجها.؟!
شوف يا ولدي نحنا بثينة دي بنحترمها شديد وما بنقبل فيها أي حاجة. صمت لمدة ثم إستدرك: السيد الرئيس كان زول حساس وبحب بشكل خاص أخوانا أبناء الجنوب وبتكلم عن جمالهم الخاص.
يعني ممكن تكون زوجته.؟!
والله ما عارف - ماداً يديه للأمام ورافعاً كتفيه للأعلى - يمكن.
- السيد الرئيس كان دقيق جداً.. وحريص على أسراره وشايل المذكرات دي وأوراقه الخاصة في شنطة ما بتفارقو أبداً في العربية وفي البيت والمكتب بس معاهو.
والمذكرات دي هسع وين.؟!
السيد شالها أداها لي واحدة محامية في التجمع وهي الروحتها.
ياتو تجمع القاصدو في كلامك ده.؟!
التجمع الوطني.
وليه أداها ليها.؟!
عشان تحفظها وتنشرها في الموعد المحدد.
يعني ما أحتفظ بي نسخة ثانية منها.؟!
كان في نسخة في بيتو بس اتسرقت.. وسرقها زول قريب جداً.. وكلنا عارفنو.
هو منو السارق ده.؟!
ما بقدر أقول لأنو ما عندي دليل مادي عليهو بس الشافوه شايل الشنطة قالوا كده.
القالوا ديل منو.؟!
برضو ما بقدر أقول ليك عشان ما عارف هم ما صرحوا بالموضوع ده ليه.
ممكن يكون كاتب في وصيته عنها.؟!
أكيد كاتب في وصيته عن هذا الموضوع.. بس هي كمان كانت مع الورق الاتسرق في ذات الشنطة.
لماذا لم تتحدث عن هذا الموضوع.؟!
تحدثت عنه بمجرد طلوع الخبر ده (فالساكت عن الحق شيطان أخرس).
ختاماً ماذا تقول.؟!
- للمسؤولين.. خافوا الله في هذا الرجل وتاريخه وأفتحوا تحقيقاً على أرفع مستوى عن إختفاء مذكرات ووصية السيد الرئيس الراحل، ولكم أقول: واصلوا بحثكم عن الحقيقة واظهارها، رعاكم الله.

بعد نهاية القضية سنكشف المستور
لا يمكن أن اعتبر (الإقرار) وثيقة زواج
بسم الله الرحمن الرحيم
يقول المولى عز وجل في محكم تنزيله: (يَا أَيُّهَا الَّذِينَ آَمَنُوا إِنْ جَاءَكُمْ فَاسِقٌ بِنَبَأٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ) صدق الله العظيم.
نسأل الله حسن الخاتمة رغم أن البعض لا يسألها، ونقول نسأل الله حسن الخاتمة لمن يسألها ومن لا يسألها.
يا أخي هل تصدق أن في زماننا هذا أخ له أخت شقيقة معاقة تسكن جواره مع أولاد شقيقه، لا يزورها ولا يعرف عنها شيئاً.؟!
هل هناك خير ترجوه منه.؟!
بعد نهاية القضية سوف نضع النقاط على الحروف وكشف المستور طالما أرادوا ذلك والبادئ أظلم.
شوف خذها قاعدة الطرف الذي يلجأ لإثارة موضوع تنظره محكمة، هو طرف خاسر.!!
هذه الورقة التي تحمل أسماء شهود لا توجد لهم عناوين أو أرقام جوازات ولا يوجد في الورقة موافقة ولي الأمر هل يمكن اعتبارها وثيقة زواج هكذا.؟!
توقيع الرئيس معروف للملايين فقد كانت الصحف تنشره في قرارات أصدرها لسنوات طويلة.؟!
فات عليهم أن الرئيس لا ينقط الجيم في جعفر.. وهذه نقطة.؟! وقد لاحظ هذا السيد حيدر كبسون وزير مايو في عدد من المناصب.
وهذه ذكرتني بالصورة المشهورة التي جمعته بي آريل شارون وحين سألته منها وكنا بالقاهرة في بداية التسعينيات طلب مني ملاحظة يديه في الصورة وفيها أربعة خواتم (مفردها خاتم)، وقال إنه لم يلبس إلا خاتماً واحداً بعد زواجه من الحاجة بثينة.!
صحيح عبد الغفار نميري هو وريث شرعي للرئيس الراحل جعفر محمد نميري.. عليه رحمة المولى عز وجل.
عبد الغفار نميري عم الرئيس نميري ود عم أبوه مش عمه لزم كما ذكرت صحيفة من قبل.!!
عبد الغفار نميري لم يكن من المقربين للرئيس نميري ويمكن أن تقول إن العلاقة كانت فاترة.!!
حاولت شخصياً تصليح العلاقة بينهما.. والله العليم يشهد على ذلك، فقد ذهبت لعبد الغفار نميري وسألته: ماذا يوجد بينك وبين الرئيس.؟! ولماذا هذا الفتور في علاقتكما.؟!
وكررت المحاولة بعد سؤالي للرئيس نفس السؤال عدة مرات.!!
شقيق عبد الغفار نميري.. الراحل بشير نميري الله يرحمه ويحسن إليه كان قريباً وعلاقته بالرئيس نميري ظاهرة لكل أفراد الأسرة والأهل، والرئيس نميري كان يحكي عنه عشرات القصص منذ أن كان طالباً بالمرحلة الثانوية وبعدما أصبح رئيساً وحتى المعارف يلاحظون هذه العلاقة.
لهذا لا أستغرب قول عبد الغفار نميري أن الرئيس تزوج روضة.. فهو ببساطة لا يعرفه مثلما يعرفه باقي الناس من الأسرة والأهل والأصدقاء.
والذي يعرف جعفر نميري يعرف عنه عدم إهتمامه بالأموال.
أسألوا السيد إبراهيم منعم منصور حين كان وزير مالية وسافر مع الرئيس نميري رحلات كثيرة لدول الخليج.!! أسألوه كم مرة سلمه شيكات مكتوبة باسمه ملايين الدولارات.. أسألوه كم مرة طلب منه الرئيس نميري تحويل تلك الشيكات باسم حكومة السودان.. رغم أنها شيكات شخصية هدايا من ملوك وشيوخ.
والذي يعرف جعفر نميري يعرف إن الشجاعة لا تنقصه من الإعتراف بهذا الزعم.
والذي يعرف جعفر نميري يعرف أنه إذا خيروه بالزواج من أخرى فسوف يختار امرأة بمواصفات الحاجة بثينة سيدة سيدات السودان.. ربنا يديها الصحة والعافية ويصبرها على رحيل أعظم رجال السودان والذي طبق شرع الله وأراق الخمر وشتل عرفات لن يصيبه كيد كايدين ولا حقد حاقدين من قريبين أو بعيدين.!!

» روضة ضرة جديدة لبثينة تحمل إثبات زواجها من النميري